Loading

Boyanka Kostova e a Nova canción galega

Nova canción galega é o nome do futuro segundo disco do dúo de trap galego Boyanka Kostova. Un álbum polo que Chicho e Cibrán levan agardando demasiado tempo. Un café con eles basta para ver en primeira liña a velocidade á que se moven estes compostelanos. Ao seu ritmo, todo avanza e caduca axiña. 

Cinco bandas galegas no Osa do Mar

Chega unha nova edición do Osa do Mar. O festival de Burela promete público da man de Carolina Durante e fantásticos temas e bos concertos con Kokoshca e La Plata. Este ano apostaron decididamente polas bandas galegas, como sempre debe ser nun evento que recibe aportacións públicas. Nós quixemos facer a nosa particular selección.

12+1 murais do DesOrdes Creativas

O DesOrdes Creativas, o festival internacional de arte na rúa que converte a Ordes nun enorme espazo de rexeneración urbana e diálogo social, chega á súa duodécima edición. Este ano, os convidados ao festival internacional de arte na rúa son Daniel Muñoz, Alegría del Prado, Twee Muizen, Artez e Leandro Barea. Nós falamos cos organizadores e pedímoslles que escolleran os mellores murais da historia do evento.

O rigor histórico de Abel Alves

Falamos co guionista e debuxante de banda deseñada Abel Alves (Ferrol, 1981). Este ano é un dos nomes do cartel do festival de banda deseñada Viñetas desde o Atlántico. “Levo vindo a todas as exposicións desde a primeira edición, sen faltar ningunha. Asistir como convidado é un luxo”. Falamos da súa obra, da súa relación coas editoriais e do traballo cos debuxantes.

Falamos con Amaia de Kokoshca

Vellos coñecidos do underground estatal, Kokoshca son unha banda en constante superación. A finais de 2018 publicaron El Mal, o seu último e mellor disco. Sobre este traballo e moitas outras cuestións preguntamos a Amaia Tirapu, vocalista e guitarra do conxunto. Dinos que “o mal na música atópalo na xente que non é auténtica, que se vende”.

Xullo, mes dos festivais de música

Chegou o mes de xullo e con el comeza a explosión (pouco controlada) de festivais nas catro provincias do país. Contabilizamos máis de 40 eventos nas próximas catro fins de semana. Comezando co Resurrection e o PortAmérica nos próximos días. Corenta festivais e moi poucas sorpresas. Escasas propostas que conviden á emoción. Estoupará a burbulla?

O debut de Cecilia F. Santomé

Falamos con Cecilia F. Santomé, que atopou o equilibrio entre o que dá de comer e o que te alimenta realmente por dentro para escribir a súa primeira novela, Quérote. Eu tampouco, editada por Xerais. Unha historia polifónica na que se dá boa conta do tremebundas que son ás veces as relacións de parella. 

Unha historia da nosa música

Un biopic para Pucho Boedo e outro para Ana Kiro. E unhas Letras Galegas para Andrés do Barro. Fernando Fernández Rego, que vén de analizar máis de 60 anos de música en Galicia, reclama novos referentes na cultura popular galega. Falamos con el sobre Unha historia da música en Galicia, que é unha historia de Galicia como país, desde unha perspectiva pop.

Os novos proxectos de Rubín

No primeiro dos seus libros, Miguelanxo Prado e Carlos Portela puxéronlle a David Rubín a fama de trouleiro. Catorce anos despois, ao Rubín pai quéimanlle máis as ganas de contar historias que as de saír de festa. E xa ten pechado o guión da súa nova novela gráfica, que será unha historia sobre a apocalipse pero tamén un libro de autoaxuda.

Chicharrón, espazo de liberdade

“Realmente sinto que Chicharrón é un espazo de liberdade absoluta e que os tres estamos nun momento de compenetración moi guai. Estamos en mundos diferentes, con realidades diferentes, pero no grupo temos claro o lugar no que queremos estar”. Charlamos sobre música e moito máis con Chicharrón antes do seu concerto en Compostela.

O space-pop de Fábrica de Espejos

Son a new wave chantadina en pleno século XXI. Fábrica de Espejos naceu hai dous anos á volta dun Facela Fest e xa teñen como carta de presentación dous EP que, en conxunto, funcionan como un todo coherente. Conversamos con Isaac Ferreiro, que nos conta que non se atopa demasiado cómodo coa comparativa con New Order, pero que entende por onde van os tiros…

Iggy

As cifras de O Son do Camiño

O Son do Camiño amósanos por onde van ir os tiros no Xacobeo en canto a música se refire. Deixando á marxe a calidade do evento, quixemos comparar o festival co Primavera Sound, Mad Cool, FIB e BBK Live. A conclusión é que o de Santiago é o que máis cartos públicos recibe, o que menos asistentes congrega e o que deixa menor impacto económico.

Adrián Canoura

O cinema etnográfico de Canoura

O cinema de Adrián Canoura é algo así como pasar un filtro lisérxico á cultura popular e ás tradicións galegas. Falamos con este mergullador de arquivos, que vén de ser premiado no festival de Cans e que se atopa en plena xira poñendo as imaxes á folktrónica de Baiuca. Ademáis, este domingo proxecta Rexistros no (S8) Mostra de Cinema Periférico da Coruña.

Lidia Cao

Murais e ilustracións de Lidia Cao

A ilustradora e artista urbana Lidia Cao participa na nova edición do Rexenera Fest de Carballo. “Alí recibín o meu primeiro taller de muralismo, dentro da programación do festival en 2016. Tres anos máis tarde, aquí estou, na cabeceira do cartel. cuns artistazos inmensos. Sempre penso que aínda me vén grande isto, dame un pouco de vertixe”.

O xiro de Novedades Carminha

“Facer música de baile en tempo de revolta social é menos macarra. Eu creo que nos suavizamos, pero tamén penso que seguimos tirando pedras en todas as direccións”, conta Xavi Pereiro, batería de Novedades Carminha, que actúan o sábado a partir das 21:00 horas na praza da Quintana como aposta forte das festas da Ascensión.

Davide Salvado fálanos de folk

O cantante e pandeireteiro Davide Salvado fálanos dunha morea de cousas: de Amarelo, o seu novo proxecto; da súa participación, con outros artistas, no espectáculo Lorca Namorado; da incorporación de novos estilos ao folclore, do seu cariño por actuar nos palcos pequenos… “Traballo desde a miña vida, a miña obra é moi persoal”.

“Santiago é a cidade máis onírica”

Salvador Sobral fálanos da súa experiencia preparando o espectáculo Lorca Namorado, creado por Abe Rábade e que se estreará durante as festas da Ascención de Compostela. O cantautor portugués tamén comparte connosco a súa relación con Galicia e cos artistas do país. “Santiago é a cidade máis misteriosa e onírica que coñezo”.

O xuramento de Aries ao seu pai

Falamos con Isabel Fernández Reviriego, a artista responsable de Aries. Con este proxecto de música electrónica está a presentar o seu cuarto disco: Juramento Mantarraya (2019). “Cando din que son unha bóla de optimismo e luz paréceme un pouco reduccionista”, lamenta. En efecto, o novo álbum desta bilbaína afincada en Vigo é moito máis ca iso.

Eroski Paraíso na gran pantalla

O director Jorge Coira atende á chamada de Inorantes a poucos días da estrea de Eroski Paraíso no Festival de Cans, no Porriño. Comentamos con el as principais chaves da adaptación ao cine dunha das mellores obras de teatro do grupo Chévere. “Segundo di Miguel de Lira, o día que vin a obra xa comentei que tiña que ter unha adaptación ao cine”, dinos Coira.

Eduard Velasco debuta na novela

Charlamos co escritor Eduard Velasco sobre a súa primeira novela publicada, Os días felices de Benvido Seixas, unha sorte de caricatura de dous eidos antagónicos da sociedade galega actual que vén de editar Xerais e que promete unhas boas gargalladas aos lectores. “A pretensión da novela é pasalo ben, rir e que rían os lectores tamén”.